الناس علي الشات

الناس علي الشات

كتير بما ان مشكلتي الايام دي مع الشات – بفكر في الشات والناس عليه وكتير قعدت جنب ناس بتتشات مع ناس وطلعت بكذا حالة تصويرية :

-في ناس مش بتعرف تعبر بالكتابة فبتطلع تعبيراتها جامدة وجافة علي عكس شخصيتها او شعورها ودايما بتتفهم غلط وتحتاج انها تحلف كتير علي حاجات حاساها بس مش عارفة تتكلم عنها .

-في ناس بقي بيبقي شعورها طاير علي الشات وتلاقيها مغرقة الشات ضحكات او حزن او قلوب او ايموشن تانية محاولة انها توصل شعورها للي قدامها باي شكل وانا شخصيا بحب النوع ده جدا لانهم علي الفطرة .

-في صنف من الناس بقي وهو الاسوأ ومش هنعته غير بكده تلاقيه مثلا بتكلمه عن مشكلة عندك او مأساة حقيقية عندك لو انت شايفه قدامك ممكن تتخض تلاقيه يا اما بياكل او بيتشات مع حد تاني عبال ما تخلص نكد او يقوم يروح في اي حتة او يتكلم في التليفون وممكن ينام قدام الكمبيوتر عبال ما تخلص وتسأله تقوله معايا يقولك معاك جدا وحاسس بيك ومقدر شعورك النوع ده شفته قدامي في اتنين كنت قاعده مرة جنبهم وهما بيتشاتوا وقلتلهم اتكسفوا علي دمكم وكفاية استهتار بمشاعر الناس كون ان حد بيحكيلك لانه مرتاحلك نفسيا فدي نعمة تقابلها بشكر والا لا , حقيقي ببقي مشفقة علي الناس دي لان الموضوع بكل بساطة ممكن ترفض الشات من الاول لو انت مش مستعد ليه اما انك تخدع اللي قدامك ووالله بيحس حتي لو مش شايفك .

-في ناس مش بترد علي الشات خالص تقعد تبعتلها ومفيش رد وبيبقوا قاعدين هتقولي احسني الظن هقولك ماهو الفيس بوك بقي فضيحة بيقولك ان فلان شاف الرسالة والساعه كام !ورسالتي لدول لو مش عايز ترد وقتها او عموما في اوبشن اسمه انك تبقي اوفلاين هتريح وتستريح او تبقي ترد علي الناس وتعتذر انك مش هترد دلوقتي .

-في ناس انا منهم مش بيعرفوا يشيتوا مع اكتر من حد وفي ناس حريقة تلاقيهم فاتحين 10شات مع بعض وتلاقي كلام غريب ممكن يوصلك عن طريق الخطأ وانت وحظك بقي يتبقي شتيمة يا حب يا شكر يا اعتذار , الشات عامل زي الكلام ينفع تكلم 10في نفس واحد بكلام مختلف ؟ حقيقي هي شخصيات جامدة اللي بتعمل ده بس بترهق نفسها بدنيا وذهنيا من كتر التركيز وبعد فترة صغيرة تقوم من علي الفيس خالص .

في ناس انواع وانواع كتير ممكن اكملها بعد كده بس اللي انا عايزة اقوله ان الشات عمره ابدا ما كان بديل عن التواصل الحي بين الناس وبعضها الروح بتفرق والمشاعر بتفرق وبزعل قوي لما بيكون حد زعلان او متضايق من حاجة وعايز يفضفض مع حد ويدخل يشيت معاه ليه مبقاش الواحد لما بيبقي متضايق نتكلم مع اصحابنا في التليفون او نتقابل ونقعد نتكلم بيبقي في احتواء اكتر او وضوح اكتر , مشاعر ظاهرة جدا تعبيرات وش بتحمل معاني كتير حية وجميلة دموع تتمسح وحضن يريح

واخيرا الا لعنة الله علي الشات :)