ارذل العمر

موقف هزني جدا ,,في النبطشية ......راجل مسن وصل مع الاسعاف الصبح في حالة غيبوبة كبد ومش معاه حد من اهله ومش عارفين اي حاجة عنه .... رجل يبلغ من العمر 70 عام وجده المسعفون ملقي في الشارع ويغطيه الذباب ,عملنا اللازم معاه لكن لحد العصر محدش جه من اهله ولا سئل عليه حالته مزرية جدا حاولنا معاه نبقي اهله وبندور علي اي بطاقة لقينا كارنيه عضوية في جمعية المحاربين القدامي !!!!!!!
هو مش مستوعب ولا في وعيه ولو فاق شوية يبقي متوه وطبعا ليس هناك تحكم في البول والبراز كل من تعامل مع الحالة اصيب بالغثيان من رائحته حاولنا نتقبل انه بلا اهل وسألت احد العمال ان يحضر له ملابس من اي شخص حتي لو كان من البيوت المجاورة للمستشفي وبالفعل احضرنا ملابس نظيفة ولحسن حظه ان من كان نوبتجية معي من التمريض رجل وصراحة شهم جدا ومهذب جدا ارتدي الماسك والجوانتي وغير له ملابسه وهنا احتار الاطباء هل نحجزه ام لا ؟ وقف اطباء بوجهنا ورفضوا بشدة حجزه بحجة انه لايوجد ضامن له فوافقت انا وطبيب جراحة ان نضع بطاقتنا كضامن له لحين احضار اهله او تحويله للعلاج ضمن الجمعية المنتمي اليها .

حقيقي تأثرت جدا هل هذا هو ارذل العمر ؟
هل يعيش الانسان كل هذا العمر ليموت وحيدا بلا ولد او حفيد او زوجة تسانده وتساعده ؟
هل هذا هو تكريم الدولة لمحاربيها القدامي ان تحضره الاسعاف ملقي في الشارع في غيبوبة وفي حالة مزرية ؟!!!!!
نسأل الله الرحمة والعافية وان لا يحرمنا من القلوب الرحيمة التي نحيا في ظلالها